Teithiau Eraill a Manylion Pellach

Os gwelwch yn dda, a wnewch chi gysylltu â’r arweinydd cyn y daith.
Hefyd, a wnaiff yr arweinyddion gysylltu â maldwynperis@tiscali.co.uk
wedi’r daith i gadarnhau nifer y teithwyr a chofiwch am hanes a lluniau i’w cynnwys ar y wefan.
Os oes darpar-aelodau ar un o’r teithiau, a wnaiff yr arweinydd yrru’r enwau, cyfeiriadau a chyfeiriadau e-bost at Clive James …
ymholiadau@clwbmynyddacymru.com

Dringo dan do. Pob nos Wener cynta’r mis bydd rhai o aelodau’r Clwb yn ymgynnull yng nghanolfan dringo dan do y Beacon. Mae’r nosweithiau yn addas i ddechreuwyr neu i’r rhai sydd yn dymuno gwella eu sgiliau dringo. Os oes ganddoch ddiddordeb, yna cysylltwch â Gwyn Roberts ar 01286 870534, Arwel Roberts ar 01492 514424 neu Anita Daimond ar 01492 600414.

Dringo gyda’r nos. Bydd dringo ar greigiau tu allan gyda’r nos yn Ogwen yn cychwyn o ddydd Iau cyntaf mis Mai ymlaen. Cyfarfod yng Nghaffi Ogwen. Cysylltwch ag Arwel Roberts ar 01492 514 424, Arwelgwydyr@aol.com ac i gael eich cynnwys ar restr e-bostio dringo.

LLAMFF – Gwyl Ffilmiau Mynydd Llanberis – Nos Wener tan brynhawn Sul, Mawrth 5-7fed
Fel rhan o’r gweithgareddau ar fore Sadwrn, Mawrth 6ed am 11.30 yn yr ystafell AV, Mynydd Gwefru (Electric Mountain), Llanberis dangosir y ffilm 'Dringo'r Dom'. Am 12.20 yn dilyn y ffilm – sgwrs gyda John Ellis Roberts, Robin Evans, Iolo ap Gwynn ac eraill am y ffilm a’r ffilmio.
Ac i orffen am 12.45 – lansio llyfr Dewi Jones, 'Ar Drywydd y Dringwyr' (cyhoeddwyr Gwasg Dwyfor) sy’n fraslun o hanes datblygiad mynydda a dringo fel adloniant corfforol ym mynyddoedd Eryri, yr Alpau, yr Himalaia ac America o’r cyfnod cynharaf hyd at y 1920au. A5, 200 tudalen gyda nifer o hen luniau ac 8 tudalen lliw.

.
Pris £10 … cyfle i brynu’r gyfrol wedi’i llofnodi gan yr awdur

Penwythnos Dringo a Cherdded Bro Gwyr, 14-16 Mai
Trefnydd: Guto Evans – guto.evans@btinternet.com – 07824 617131.
Llogwyd hostel YHA Porth Einon. Mae lle i 26 aros, a chegin a chyfleusterau eraill. Y gost yw £40 y pen am y penwythnos heb gynnwys bwyd. Mae tafarn leol sy’n gwneud bwyd, a siop pysgod a sglodion. Gellir trefnu lle i wersylla yn y pentref hefyd, os bydd yr hostel yn llawn. Neu, wrth gwrs, dewch am y dydd. Mae Bro Gwyr yn enwog am y dringo, y mwyafrif yn ddringen sengl, gydag amrywiaeth o rai caled a rhai haws ac addas i gychwynwyr. Bydd llanw uchel ar y penwythnos yma, a’r penllanw yn gynnar yn y bore, felly bydd digon o gyfle i ddringo ar y clogwyni yn ystod y dydd. Bydd Guto wedi paratoi llawlyfr ynglyn â graddfa’r dringfeydd, a bydd offer dringo’r Clwb ar gael i’w fenthyg. Ceir llawer o lwybrau diddorol yn yr ardal hefyd, yn fryniau ac arfordir, a bydd cyfle i fynd i Ben Pyrod (Worm’s Head) gan fod y trai mor isel, neu Burry Holm gyda’i oleudy haearn (yr un olaf yn Ewrop). Bydd mwy o wybodaeth i’r rhai sy’n dod yn nes at yr amser.
I sicrhau lle i aros, rhowch eich enwau a manylion cyswllt i Guto erbyn Mawrth 6ed, os gwelwch yn dda (ffurflen ynghlwm). Mae angen i’r Clwb dalu’r YHA ddeufis ymlaen llaw.
Os am ymuno yn y gweithgareddau, ond ddim am aros, rhowch wybod i Guto erbyn nos Fercher 12 Mai, gan nodi pa weithgaredd yr hoffech ei wneud.
Mae na 17 o enwau erbyn hyn – felly brysiwch i archebu lle!

Gostyngiadau!
Mae Cotswold yn ei siopau Royal Oak a Rock Bottom ym Metws y Coed wedi cynyddu'r gostyniad i aelodau CMC i 20% trwy fis Mawrth.
Bydd rhaid dangos eich cerdyn aelodaeth 2010 a defnyddio'r cyfeirnod C2036.

Sherpa’r Wyddfa
O 28 Mawrth 2010 ymlaen fedrwch chi deithio ar fysiau ‘Sherpa’ rhwng Llanberis, Nant Peris, Pen-y-pass, Capel Curig, Betws-y-coed a Bethesda am £1 bob siwrnai! Gobeithio bydd hyn yn annog pobl i anghofio’r car, a defnyddio cludiant cyhoeddus i deithio trwy Barc Cenedlaethol Eryri. Am wybodaeth amserlen gweler www.goriadgwyrdderyri.co.uk neu www.gwynedd.gov.uk/bwsgwynedd

Siopau Trespass
Mae siopau Trespass wedi cytuno i roi 10% i ffwrdd oddi ar unrhywbeth yn eu siopau ym Mwllheli, Abersoch a Bangor i aelodau CMC. Rhaid dangos eich cerdyn aelodaeth. I aelodau yn y De yna mae gan y cwmni ddwy siop – Penybont a Glyn Ebwy.

Diwrnod Blasu – Gorffennaf 10-11eg
Yn dilyn llwyddiant y diwrnod blasu’r llynedd bwriedir cynnal diwrnod / penwythnos gyffelyb ddechrau Gorffennaf – manylion i ddilyn!

Penwythnos y Rhinogydd, Mehefin 18-20
Mae Iolyn ac Eirlys yn ein gwahodd i dreulio penwythnos yn ardal Ardudwy, ac wedi bod yn cynllunio teithiau ar y Rhinogydd ar ein cyfer. Ceir manylion y teithiau yn y rhaglen. Os ydych am fynd yno i aros, mae angen archebu lle drwy gysylltu ag Eirlys, 07901 542852 tyddynllidiart@fsmail.net Os am ddod am y diwrnod, dylsech roi gwybod i Eirlys erbyn nos Fercher, 17 Mehefin, er mwyn hwyluso’r trefniadau cludiant / parcio. Rhannwch geir os oes modd. Dyma’r manylion aros: Tyddyn y Llidiart, Dyffryn Ardudwy (cartref Eirlys a Iolyn) CG: SH 601 255. • Bydd un llofft sengl sbâr yn y tŷ – cyntaf i’r felin. • Bydd croeso i unrhyw un godi pabell wrth y tŷ, neu gysgu yn yr ysgubor sy'n sownd yn y tŷ, ac sydd newydd gael ei hail-wneud; mae cawod a thoiled nepell o ddrws cefn y tŷ. Angen dod â brecwast a bwyd mynydda. Byrdir, Dyffryn Ardudwy (lle gwely a brecwast)
Mae lle i’w gael ar fferm Byrdir, (CG: SH 598 242 www.byrdir.co.uk), heb fod ymhell o Dyddyn Llidiart. Mae Eirlys wedi taro bargen efo’r perchennog am wely a brecwast yno, sy’n golygu £30 y pen y noson. Bydd angen dod â bwyd mynydda.
Yn y ‘stiwdios’: Ystafell i 3 person (1 gwely dwbl ac 1 gwely byncs), Ystafell i 3 person (1 gwely dwbl a 2 wely sengl), Ystafell i 2 berson (gwely dwbl), Ystafell i 2 berson (2 wely sengl). Yn y tŷ: Ystafell i 2 berson (2 wely sengl) ac Ystafell i 1 person (gwely sengl).
I drefnu lle yn Byrdir, dylsech gysylltu ag Eirlys, nid â’r perchennog. Bydd hyn yn galluogi Eirlys a Iolyn i wybod pwy sy’n dod, a sicrhau defnydd gorau’r ystafelloedd sydd ar gael. Bydd angen talu’r £30 i Eirlys wrth archebu lle. Os byddwn yn llenwi Byrdir, bydd Eirlys yn cyfeirio’r gweddill at lefydd gwely a brecwast eraill yn y cyffiniau, iddynt wneud eu trefniadau eu hunain. Felly os oes gennych ddiddordeb, cysylltwch reit handi.

Stondin Mynydda yn Steddfod Glyn Ebwy
Bydd y Clwb yn rhannu stondin ‘Mynydda’ gyda grwpiau eraill – rhagor o fanylion i ddilyn.