Tryfan 7 Chwefror
Pymtheg ohonom a gyfarfu ar ochor yr A5 ger Glan Dena ar fore oer.
Nifer wedi ffonio'r noson cynt i holi os oedd y daith ymlaen.
Anita, Alwen a Ceri, Morfudd, Sharon (o Lerpwl), Alwyn (cyd-arweinydd), Gareth Glynceiriog, Eryl Owain, Gareth Wyn, Ken a Jason, Raymond, Guto (wedi dod yr holl ffordd o Rydaman), John Parry a minnau.
Eira i lawr at y ffordd fawr a chriw o eifr gwyllt (rhai drewllyd) yn cysgodi ymysg y cerrig wrth y llwybr. Arwydd o dywydd drwg yn uwch i fyny?
Dilyn y llwybr heibio Tryfan Bach, i fyny'r hafn i waelod yr Heather Terrace. Eira meddal gyda thalpiau mawr o rew ar y creigiau.
Penderfynnu gwisgo'r cramponau cyn dechrau ar y Teras. Eira meddal ar y llwybr a mwy ohono ar waelod pob hafn roeddem yn ei groesi. Paned sydyn mewn man cysgodol a phibonwyddion peryglus i'w gweld uwch ein pennau.
Criw o bedwar yn mynd heibio gyda'r bwriad o wneud North Gully (un darn yn radd 4), sgwrs sydyn hefo nhw, ninnau am wneud Little Gully ychydig lathenni i'r chwith. Gadael y Teras ac ymgynnull ar silff ar waelod Little Gully. Deg yn cychwyn i fyny'r hafn tra bod pump ohonom yn rhaffu. Dwy raff, minnau, Jason a Guto ar un gydag Anita ac Alwyn ar y llall o. Ken yn aros hefo ni, y gweddill wedi diflannu i'r entrychion.
Dilyn hafnau yn y graig am 3 hyd rhaff cyn croesi ar draws North Gully, uwchben y darn anodd. Cip sydyn o'r pedwar oddi tanom ar y North Gully. Trwch o eira meddal ar ben hen eira caled; ymlaen i fyny i'r niwl, spindrift ac oerwynt, i orffen ar y grib ogleddol ychydig funudau o'r copa.
Tynnu lluniau, cinio sydyn. Tra roeddwn yn tynnu lluniau roedd na lygoden fechan yn helpu ei hun i friwsion yn fy mocs brechdannau!
I lawr yn eitha sydyn, croesi'r gamfa ac yn syth i lawr i Gwm Tryfan.
Cyrraedd y ceir am 5 o'r gloch. Gweddill y criw i lawr ers oriau ac yn ein disgwyl yn y Bryn Tyrch.
Diwrnod da er gwaethaf y tywydd.
Diolch i Alwyn am gyd-arwain, yntau'n gwneud ei ML Haf, ond tydi taith gaeaf ddim yn cyfri!
Adroddiad gan Maldwyn Roberts
Lluniau gan Maldwyn Roberts (1-8) a Guto Evans (9-15) ar Fflickr
o.n. Roedd Myfyr Tomos wedi cyfarfod y pedwar oedd ar North Gully yn dringo ar y Gader ar y Sul!
Lluniau:
- Geifr!
- Anita ar y darn cyntaf
- Eryl a Gareth ar waelod yr hafnau
- Canol North Gully
- Cinio
- Guto ar y trydydd ddringen
- Un hyd rhaff o'r grib ogleddol
- Ar y copa
- Y criw uwchben Tryfan Bach
- Rhew ar y Teras
- Morfudd (y criw yn y cefndir ar waelod North Gully)
- Rhai o weddill y criw ar ddechrau'r hafnau
- Canol North Gully (Ken yn nhop y llun yn disgwyl)
- Ar y copa
- Ar y ffordd lawr