Pedol Iawn Yr Wyddfa 13 Gorffennaf

Syniad Eryl oedd y daith yma, piti iddo fethu neud hi ond braint oedd cael camu i ’r adwy ac arwain. A syniad gwych oedd hi hefyd, ymestyn Pedol Yr Wyddfa i gynwys Carreg Gwalch ar y dechrau a Gallt y Wenallt ar y diwedd.

Er bod tri chwarter o’r daith yn gyfarwydd iawn i mi doedd gen i ddim syniad sut oeddem ni am fynd o lethrau Gallt y Wenallt yn ôl i Pen y Gwryd. Dwy reci yn ddiweddarach dwi'n meddwl ges i lwybr go lew ond fel ddywedais i'r criw ar ddechrau'r daith “os oedd rhywun ddim yn hapus efo'r llwybr, syniad Eryl oedd o…” .

Ar ôl ychydig o drafferth efo'r bws dyma gyfarfod yn Pen y Pas yn ganol prysurdeb a'r sŵn da ni wedi dod i ddisgwyl bellach. Criw o 17 sef Gerallt, Aled, Wil, Ali, Anwen, Jano, Sioned, Sandra, Elen, Eurig, David, Adrian, Steve, Nia Wyn, Erwyn ac Anna.

Ar ôl cerdded cwta canllath i fyny llwybr y mwynwyr dyma droi fyny am Carreg Gwalch a gadael y torfeydd a'r sŵn. Braf oedd cerdded ar y grib a gweld neb nes cyrraedd Bwlch Moch a mynd ymlaen am Crib Goch. Doedd pedwar aelod o'r criw erioed wedi bod dros y grib o'r blaen ac roedd cymysgedd o arwsyd a brwdfrydedd yn amlwg.

Rhaid fi ddweud mod i erioed wedi gweld gymaint o bobl ar Crib Goch. Roedd y rhesi o bobl yn aros i fynd ymlaen ar hyd y grib yn fy atgoffa o'r lluniau o bobl yn ciwio i fynd dros yr Hilary Step ar Everest! Er hyn dwi'n eithaf siŵr fod pawb wedi mwynhau'r her a braf oedd cael seibiant bach ym Mwlch Coch.

Doedd fiw i ni din droi gormod ym Mwlch Goch gan fod gryn bellter i fynd, felly ymlaen dros Crib y Ddysgl a ni. Toc wedi cychwyn dyma'r golygfeydd yn diflannu ar glaw yn dod a dyna sut oedd hi wrth i ni frysio dros copa'r Wyddfa i ddianc o'r torfeydd. Erbyn cyrraedd copa Lliwedd roedd y glaw a'r cymylau wedi cilio a braf oedd gweld y golygfeydd eto.

Ar gopa Lliwedd Bach roedd Iolyn yn aros amdanom ac ymunodd efo ni am weddill estyniad y bedol. Ar ôl gadael y llwybr sydd yn mynd lawr o Lliwedd a mynd ymlaen am Gallt y Wenallt cawsom y mynydd i ni ein hunain unwaith eto. Mi ddaru pawb fwynhau y daith i lawr crib Gallt y Wenallt a croesi peipan ddŵr Cwm Dyli. Ychydig o frwydro drwy'r rhedyn i gyrraedd Nant Cynnyd ac wedyn tipyn o duchan wrth ddringo yn ôl i fyny i'r hen ffordd cyn ei dilyn yn ôl i Ben y Gwryd.

Wrth gyrraedd yn ôl i Ben y Gwryd doedd dim oedi ac ar ein penna fewn i Westy Pen y Gwryd am beint haeddiannol, pawb yn gytyn ein bod wedi cael diwrnod gwych o fynydda. Roedd pawb wedi mwynhau'r her, y tirwedd amrywiol a'r syniad o ymestyn y bedol. Diolch yn fawr i Eryl am y syniad ac i pawb am eu cwmni hwyliog fel arfer.

Adroddiad gan Dwynwen

Lluniau gan Gerallt, Sioned a Steve ar FLICKR