15 Copa 25 Gorffennaf

Rhyw syniad munud olaf oedd y daith yma, Ariannell wedi cysylltu rhyw bythefnos yn ôl yn gofyn ti ’n “ffansi 15 copa”? Heb oedi, yr ateb oedd ydw ond… “dim ond os ydi ’r tywydd yn dda”. Gyda mis o ’r bron heb law, be alla fynd o ’i le, felly dyma weld pwy arall oedd yn gêm.

Gan fod tywydd braf a haul wedi dod yn arferol doedd fawr o sylw wedi ei roi i ’r 50% siawns o law ar ôl amser cinio a dyma gyfarfod yn Pen y Pas toc wedi 3:00yb yn disgwyl diwrnod da. Y criw brwdfrydig oedd Erwyn, Ariannell, Ewart, Sandra, Sioned a Dwynwen.

Gan fod hi ’n bell i fewn i Orffennaf roedd yn dywyll iawn arnom yn cychwyn a gyda chwmwl isel roedd canfod y llwybr i fyny at y grib yn heriol. Ond, unwaith ar gopa Crib Goch roedden allan o ’r cwmwl a cafwyd croesi ’r grib uwchben y cymylau.

Cafwyd gwawr odidog ar Grib y Ddysgl gyda ’r haul isel yn goleuo ’r Wyddfa yn wych. Wedi piciad i gopa ’r Wyddfa lawr a ni am Nant Peris gyda ’r tymheredd yn codi.

Ar ôl cyfarfod Gerallt yn Nant Peris, a seibiant byr, ymlaen a ni ar ddringfa galetaf y diwrnod i fyny at gopa Elidir Fawr. Cychwyn fyny mewn heulwen ond y cymylau yn hel erbyn cyrraedd y copa. Erbyn mynd dros y Garn a lawr at Llyn y Cŵn roedd y cwmwl i lawr a ’r glaw wedi cyrraedd.

Yn Llyn y Cŵn penderfynodd Sioned a Sandra beidio parhau a ’r daith ac aethant lawr am Ogwen heibio ’r Twll Du ond ymlaen a ’r 4 arall. Erbyn copa Glyder Fawr roedd yn bwrw yn drwm, y gwynt wedi cryfhau a ’r niwl yn drwchus. Gan fod hon yn 15 copa cyntaf i Ariannell a Ewart mi ddaru Erwyn a fi wneud iddyn nhw ymbalfalu dros gopa Glyder Fach, dipyn o gamp yn y gwynt cryf.

Roedd y disgyn i lawr am fwlch Tryfan mor annifyr ac arfer ond pawb mewn hwylia da er ein bod yn socian. Ariannell yn fy holi a ’i hyn oedd y tywydd gwaetha am daith 15 copa o ni di gael? Ar y pwynt yma o ni ’n cofio am y cenllysg gafo ni ar daith 2022 ac yr ateb oedd na.

Roedden yn falch iawn o weld Gerallt yn Glan Dena efo ’n dillad sych ac ar ôl i bawb cael newid dillad llawn ymlaen a ni am y Carneddau. Cawsom gwmni Gethin am rhan o ’r ddringfa, diolch Geth am ddod i ’n cefnogi. Roedden nôl yn y cwmwl cyn y wal fynydd a ’r dillad dal dŵr yn hanfodol erbyn cyrraedd copa Pen yr Ole Wen.

Cawsom gip sydyn iawn ar Gwm Llafar am ychydig o eiliadau ond heblaw am hyn gwelsom dim byd o gwbwl ac roedd rhaid canolbwyntio ar y mordwyo. Daeth yn dywyll erbyn i ni gyrraedd copa Foel Grach a cawsom seibiant byr yng Nhwt Dafydd Ross.

Roedd ail cychwyn yn anodd, y lamp pen yn creu wal wen o ’n blaenau ac yn gwneud canfod y llwybr yn anodd. Roedd cael hyd i ’r trig ar gopa Foel Fras yn dipyn o gamp. Ar ôl llongyfarch Ariannell ac Ewart ar eu camp a trio cael rhyw fath o lun copa olaf roedd rhaid meddwl am gyrraedd Abergwyngregyn.

Erbyn hyn roedd y tywydd yn erchyll, gwynt cryf, glaw trwm a ’r niwl mor drwchus roedd yn anodd bod yn sicr os oedden yn cerdded fyny neu lawr allt. Roedd cychwyn lawr yn dilyn y wal yn eithaf hawdd ond roedd canfod Llyn Anafon tipyn anoddach ac roedd mawr ryddhad wrth ganfod y ffodd.

Roedd y ddwy filltir a hanner olaf yn teimlo ’n hir ond roedd pawb dal mewn hwyliau da. Cafodd Erwyn lluniau da o ’r glaw a cefais gadarnhau i Ariannell mai hyn oedd 100% y tywydd gwaetha dwi di gael am daith 15 Copa!!

Diolch i bawb am eu cwmni a diolch i Gerallt am ein cefnogi. Llongyfarchiadau i Ariannell a Ewart ar eu 15 Copa cyntaf, ond ella ddim olaf…

Adroddiad gan Dwynwen Pennant.

Lluniau gan Ariannell, Erwyn, Ewart, Dwynwen a Gerallt ar FLICKR